خليك تتشاف… خليك محمي

SHARE THIS POST:

– البسكلات على قد  ماهي  وسيلة نقل بسيطة الا انها فعالة بكل المقاييس خاصة في المناطق الحضرية و المناطق الي تكثر فيها التجمعات🏙️

الا انها تبقى بسيطة و ضعيفة مقارنة بوسائل النقل الي تمشي معاها على نفس الطريق (كراهب، كماين،  موتورات…) لذا من جملة وسائل الحماية أو بالأحرى الوقاية.. الدراج مسؤول على كونه لازم يبدى واضح و مرئي لبقية مستعملي الطريق.🚴‍♀️🌃🌆🚨

– في الطقس الشتوي، غروب الشمس يولي أبكر و ساعات النهار أقل. الدنيا تظلام فيسع و بالنسبة للعباد الي يستعملوا البسكلات في تنقلاتهم اليومية لازم يقروا حسابهم في « الضوء ». سواء يركبوه في البسكلات و الا يهزوه معاهم في الساك و يركبوه وقت الحاجة!🌄🚴‍♀️👜

شنوة هوما أنواع الضوء؟ 

 الضوء أنواع سيدي خويا! ثمة ضوء انارة (feu d’éclairage) و ضوء وضعية(feu de position) 

– ضوء الوضعية(feu de position) هو ضوء ضعيف نسبيا(حوالي 100 *lumen) مسؤول بش يوري موقع الدراج بالنسبة لبقية مستعملي الطريق.. بش يشوفوه و يفيقوا بيه و يقرولوا حسابه في الطريق. 🕯️

عادة الي يتنقل في منطقة ضاوية كيما المدينة (نظريا😜) ضوء وضعية كافي بش يشوفوه بيه الناس

ضوء الانارة (feu d’éclairage) هو ضوء قوي مقارنة بضوء الوضعية (من 200/250 lumen فما فوق) 💡💡💡

– ضوء الانارة نستعملوه خاصة في مناطق تكون فيها الانارة العمومية ضعيفة و الا منعدمة.. يصلح برشا للدراجين الرحالين خاطر ينجموا يتنقلوا في الليل في بلايص تنجم تكون ظلمة بالكامل. 

اختيار قوة الضوء تعتمد على الاطار و الاستعمالية. (داخل مناطق العمران، جبل، غابة، مخيم…) 🏞️🏜️🏕️

– الضوء التلياني (الخلفي) عادة يكون من نوع ضوء وضعية بش ما يجهرش الي يمشي وراه، لكن هذا ما يمنعش انه ينجم يكون قوي. 

الضوء القدامي (الأمامي) ينجم يكون ضوء وضعية و الا ضوء انارة.. احنا و السياق. 

– بالنسبة لمصدر الطاقة.. قبل كانوا يستعملوا الدينامو (dynamo). لتوليد الطاقة الكهربائية (التريسيتي💡😬⚡) من طاقة حركية (دوران العجلة) الا انه ماهوش فعال برشا خاطر الاحتكاك اللازم لتوليد الضوء يهري الاطارات (les pneus) و يتعب الدراج. و ما يعطيش ضوء قوي و مسترسل. 😏🥴😵

توة اغلب الاضواء بال pile و الا batterie (cellules rechargeables) 

بال pile موش خايب اما بال batterie خير بش ما نبقوش نشروا في ال piles كل مرة! 😃

كيفاش نستعملوا الضوء و كيفاش نستحفظوا عليه؟

– الضوء نحاولوا نركبوه في بلاصة راكحة و stable في البسكلات.. احسن بلاصة هي الكادر (cadre) خاطر هو الهيكل الي مبنية عليه البسكلات و نجتنبوا تركيبه على حاجات ضعيفة و متحركة (tige de selle, garde boue..) الا اذا اضطررنا! 

– نحاولوا نركبوه بطريقة يكون فيها متوازي مع الطريق.. اي في مجال النظر المباشر لبقية مستعملي الطريق.. من تالي و القدام! 🙄

– اغلب انواع الضوء الموجودة في السوق هي عادية من حيث الجودة يعني ما تتحملش الطيحان برشا و التعرض للماء و الغبرة.. اذاكا علاش الانواع الغالية هي الي فيها des certificats في العادة. كيما ip66 مثلا و الي هي تدل على انه المنتج مقاوم للماء و الاغبرة (water and dust proof) . و كل ما تكون فيها تكنلوجيا احسن يكون اغلى. 🤔🧐

– بش نجتنبوا انه يتضرب الضوء و الا يتعرض لأي نوع من العوامل الخارجية المؤثرة هاذي ننصح نحبوهم في النهار في sac à dos و الا sacoche de selle لين يجي وقت نستحقوهم نجبدوا نركبوهم. 👌

و أخيرا و ليس آخرا كي نمشوا لبلاصة و نسكروا البسكلات و نخلوها وحدها.. ننصح بش نحيوا الضوء و بقية الاكسسوارات من البسكلات (ضوء، compteur, sacoche…)  بش ما نخلوهمش عرضة للتفسيد و السرقة! 🤨

شنوة الحاجات الي نعملوهم بش نتشافوا مليح؟

توة بش نحكوا شوية sciences physiques 🤓🧐

قبل قرينا على ألوان قوس قزح – Arc-en-ciel

والوان الطيف متاع الضوء – spectre de la lumière blanche 

نجموا نقولوا الي عين الانسان تخدم كيما الكاميرا 📷📸 تستشعر الالوان و تبعثهم للمخ

العين هاذي نجموا نقوالوا الي هي مصممة بش تستشعر الوان معينين بطريقة افضل اكثر من ألوان اخرى. الكاميرا هاذي تنجم تتحسس الألوان القريبة من الأصفر و الأخضر من الطيف الضوئي أكثر من الألوان الأخرين (أذاكا علاش les gilets de sécurité و اللبسة المخصصة للعباد الي يخدموا في الطريق بالليل مصنوعة بالألوان هاذي) 🟠🟡🟢

اذاكا علاش ننصحوا، سواء عندنا و خاصة كي ماعندناش ضوء، نلبسوا حاجات في الألوان هاذي اذا امكن خاطر هي تحفز ردة الفعل عند بقية مستعملي الطريق أسرع و من مسافة أبعد. بش ينجم يبقى مجال بش يتخذ قرار في الوقت المناسب و يبعد على الدراج و يضمنله سلامته! 👌

كانكم تبسكلوا استحفظوا على رواحكم و كانكم ما تبسكلوش استحفظوا على الي يبسكلوا! 🤗😊

_______________________________________

*Lumen: هي وحدة فيزيائية لقيس شدة الانارة

على غرار وحدات اخرين كيما ال Lux و ال Candela 

المنتوجات الي فيهم انارة عادة يستعملوا ال Lumen و الا ال Lux

– TANGARA Oussama –

           *PEDALS*

#Dhaw #Opération_Dhaw #Sécurité #visible #Sécurité_routière #feux_d’éclairage #lumière #Signalisation

#Reflecteurs #ضوء